Сургалтын хөтөлбөр:

ЭХНИЙ ЖИЛД ҮЗЭХ ХИЧЭЭЛҮҮД
1. Буддын сэтгэл судлал хичээлээр:
Орчин цагийн сэтгэл судлал болон Буддын сэтгэл судлал хоёрын ялгаа,
Буддын сэтгэл судлалд сэтгэлийг юу гэж үздэг тухай,
Сэтгэл юмс үзэгдлийг хэрхэн танин мэддэг тухай,
Сэтгэлийн эерэг болон сөрөг чадамжуудын тухай,
Айдас, стресс, ганцаардал, үзэн ядалт, уур, шунал зэрэг сөрөг сэтгэл хөдлөлүүд сэтгэлд хэрхэн үүсдэг тухай,
Сөрөг сэтгэл хөдлөлүүдийг удирдах арга техникийн тухай,
Сэтгэлийн эерэг чадамжуудыг хөгжүүлэх нь амар амгалантай амьдрахын үндсэн шалтгаан болохыг логик учир шалтгааны үүднээс судална.
Буддын сэтгэл судлал хичээлийг үзсэнээр сэтгэл ухамсрын тухай нарийн ойлголттой болоод зогсохгүй өөрийнхөө сэтгэлийг тодорхой хэмжээнд ойлгож, хувь хүн өөрөө өөрийгөө танин мэдэж эхэлнэ.
2. Бурханы шашны үзэл хичээлээр:
Ертөнцийг үзэх үзэл амьдралын мөн чанарыг тодорхойлдог билээ. Бурханы шашинтнууд бодит байдал ямар мэт буйг яг тэр хэвээр нь танин мэдсэнээр ертөнцийн мөн чанарыг ухаарч амьтанд хорлолгүй явдал мөртэй, амар амгалан амьдралыг бүтээж чаддаг.
Бурханы шашны үзэл хичээлээр юмс үзэгдэл болон сэтгэл оюуны харилцан хамаарлыг ухаарч өөрийн сэтгэлээ сахих нь аз жаргалаа сахиж буйтай утга нэг болохыг мэдэх болно.
3. Буддын шинжлэх ухаан хичээлээр:
Орчин цагийн шинжлэх ухаан болон Буддын шинжлэх ухаан хоёрын ижил төстэй талууд,
Буддын шинжлэх ухаанд юмс үзэгдлийн үүсэл гарлыг юу гэж үздэг тухай,
Матери болон ухамсрын ялгаа,
Материас ухамсар үүсэж болох эсэх тухай,
Харах, сонсох, үнэрлэх, амтлах, хүрэлцэх гэсэн таван мэдрэхүйн тухай,
Таван мэдрэхүйд мэдэгддэг юмс үзэгдлийн нарийн ялгаа болон тус тусын шинж чанарын тухай,
Шалтгаан болон үр дагаварын харилцан хамаарлын тухай,
Ухамсрын үргэлжлэл буюу урд хойд төрлийн тухай,
Ухамсарт эхлэл байдаг эсэх тухай Буддын гүн ухааны суурь ойлголтуудыг логик учир шалтгааны үүднээс судлана.
Буддын шинжлэх ухаан хичээлийг үзсэнээр юмс үзэгдлийг логик учир шалтгааны үүднээс үнэн зөвөөр танин мэдэх нь амар амгалантай амьдрахад асар их нөлөөтэй болохыг ойлгохын зэрэгцээ цаашид Буддын гүн ухаан болон Буддын сонгодог зохиолуудыг судлах үндсэн суурьтай болно.
4. Бясалгалын хичээлээр: Бодлын эрхээр ийш тийш үсчих тогтворгүй сэтгэлийг тогтуун болгох шамата бясалгалын аргад суралцаж, бясалгана. Цаашлаад сэтгэл дэх зовлонгийн шалтгаануудын нэг болох юмс үргэлж нэг хэвээрээ байна гэх буруу үзлийг арилгах мөнх бусын ухаарлыг дурьдан бясалгаж, мөнх бус жамыг сэтгэлдээ дадуулж, шинжилж бясалгах аргад суралцана.
5. Анханд Оюун Судлахуйн хичээлээр:
Бурхан Багшийн сургаалд анхлан суралцагч нарт гарах найман алдааг ойлгосноор хэрхэн өөрийгөө хуурахгүй үр дүнтэй суралцах аргыг үзүүлсэн "Бодь Мөрийн Зэрэгт Оюунаа Судлахад Эхэнд Оюун Судлахуй - Номын Үүдийг Нээгч" хэмээх шастирыг тайлбарлан хөтөлнө.
6. Газар мөрийн хуваарь хичээлээр:
Төгс гэгээрэх хүртэлх сэтгэлийн эрдмүүдийн тухай нарийвчлан судлана.
7. Долоон гишүүнт хичээлээр: Өдөр тутамд сэтгэлийг ариусгаж хөгжүүлэх долоон увдисыг судлана.
8. Төвөд хэлний хичээлийг сонголтоор үзнэ.

ХОЁР ДАХЬ ЖИЛД ҮЗЭХ ХИЧЭЭЛҮҮД:
1. Бодь мөрийн зэрэг хичээлээр:
Зовлон бүхний шалтгаан болсон уур, шунал, мунхаг хийгээд ганц өөрийгөө энхрийлэх оюун зэрэг буруу сэтгэл бүхнийг хэрхэн яаж гурван төрөлхтний мөрийн зэргээр арилгах тухай гүн нарийн бясалгалын аргыг үзэж судална. Бодь мөрийн зэрэг хичээлийг судалснаар өөрийн болон бусдын сэтгэлийг төгс гэгээрүүлэх нарийн дэс дараалал бүхий Бурханы шашны охь шим бүхэн бүрдсэн бясалгалын тухай үнэн зөв, цогц ойлголттой болно.
2. Бодьсадвын явдалд орохуй хичээлээр:
Төгс гэгээрлийн уг шалтгаан болсон өөрөөс илүү бусдыг энхрийлэх бодийн сэтгэлийг хэрхэн яаж бясалгах цогц аргыг үзүүлсэн Шантидэва Гэгээний зохиол “Бодьсадвын Явдалд Орохуй” хэмээх шастирыг судлана.
3. Хоёр үнэн хичээлээр: Хамаг юмс шүтэн барилдсан учир өөрийн мөн чанараар хоосон хэмээх ухагдахууныг судлана.
4. Арилсан орны судалгаа хичээлээр:
Диваажин, Илт Баясгалант зэрэг бурханы орнуудын тухай, тэдгээр оронд бидэн шиг эгэл төрөлхтнүүд төрж болдог эсэх тухай учир шалтгааны үүднээс тайлбарласан “Арилсан Орны Судалгаа” хэмээх шастирыг судлана.
5. Бясалгалын хичээл үргэлжлүүлэн орно.